2018-imiit 2028-mut innuttaasut amerlassusissaat (2050)

Innuttaasut amerlassusissaannik isikkussaannillu naatsorsuutit inuiaqatigiit pillugit pilersaarusiornerni pingaartorujussuupput. Naatsorsueqqissaartarfimmilu tutsuiginartunik innuttaasut ineriartornissaannik naatsorsuinissaq pingaartinneqartorujussuuvoq.

 

1990-ikkut qiteqqunnerannili Naatsorsueqqissaartarfimmit innuttaasut amerlassusissaat saqqummersinneqartalerput, taakkulu suliarineri pitsanngoriartuinnarput. Ukiut siulliit saqqummersitsinerni ukiut tallimakkaarlugit Kalaallit Nunaat tamakkerlugu innuttaasut amerlassusissaat saqqummiunneqarput. 2012-imi innuttaasut amerlassusissaannut kisitsisit kisitsisaataasivimmiilerput. 2014-2016-imi innuttaasut amerlassusissaat nunami sumiiffinnut assigiinngitsunut immikkoortinneqarput. 2017-imi Inatsisartut Qaasuitsup Kommunia kommuninut marlunnut avittussanngortippaat, innuttaasut amerlassusissaannut naatsorsuineq allanngortinneqartarialersillugu. Siullermik paasissutissat tunngaviusut kommunit nutaat tunngavigalugit immikkoortiterneqarput.

 

Maanna saqqummersitsinermi siusinnerusukkut naatsorsuinerit ilaannut periaaseq atorneqartarsimasoq iluarsineqarpoq. Iluarsiineq sunniuteqangaatsiarmat nunap immikkoortuinut innuttaasut amerlassusissaannut atussallugu suli tulluanngilaq.